ဟိုချီမင်းမြို့တော်ကအရှေ့တောင်အာရှဘာသာစကားနဲ့ဘာသာဗေဒ ပညာရပ် စာတမ်းဖတ်ပွဲ

“ဟိုချီမင်းမြို့အဝင် ဆိုင်းဘုတ်”

ဒီတစ်ခါစာတမ်းဖတ်ပွဲက စာရေးသူလေ့လာထားတဲ့ မြန်မာစာဘာသာရပ်နဲ့ တိုက်ရိုက် ပတ်သက်တဲ့ ပွဲလို့ဆိုရမှာပါ။ တိဗက်-မြန်မာအနွယ်ထဲက တစ်ခုဖြစ်တဲ့ မြန်မာစာဟာ အရှေ့တောင်အာရှ ဘာသာစကားတွေထဲက အဓိက ဘာသာစကားတစ်ခု ဖြစ်တာကိုး။ သွားရမဲ့ နေရာကလည်း စိတ်ဝင်စားစရာ သွားရောက် လေ့လာချင်နေတဲ့ ဗီယက်နမ်နိုင်ငံ ဖြစ်နေပါတယ်။ ဘာလို့ဆို ဒီကနေ့မှာ ဗီယက်နမ်နိုင်ငံဟာ အရှေ့တောင်အာရှရဲ့ ကျားတစ်ကောင် ဖြစ်လို့လာနေပြီ ဆိုတာကို သတိထားမိ လာကြပြီလေ။ စီးပွားရေးအရ ပြောတာပါ။ ၁၉၅၉-၁၉၇၅ အတွင်း ဗီယက်နမ်နိုင်ငံ ပြည်တွင်းစစ်ပွဲကြောင့် ပြာပုံကြားကေန ရုန်းထလာခဲ့ရတဲ့ နိုင်ငံတစ်နိုင်ငံအဖြစ် ရပ်တည်လာခဲ့ကြတာ စစ်အပြီး ဧပြီ ၃၀ ၁၉၇၅ ကနေ ၁၉၈၄ ခုနှစ်အထိတော့ စီးပွားရေးမှာ ခပ်နှေးနှေးပုံမှန် အနေအထားတစ်ခုသာ ဖြစ်ခဲ့တာကို တွေ့ရပါတယ်။ ၁၉၈၄ ကအစပြုလို့ ဗီယက်နမ်နိုင်ငံကြီးဟာ နိုင်ငံရဲ့စီးပွားရေးဆိုင်ရာ မူဝါဒတွေမှာ ဗီယက်နမ် ပြည်သူတွေအတွက် တံခါးဖွင့်ဝါဒနဲ့ အမှန်အကန် ပြောင်းလဲကျင့်သုံးလာခဲ့လို့ အခု ၂၀၀၉ခုနှစ် (၂၅နှစ်)တွင်းမှာ သိသိသာသာ တိုးတက်နှုန်း မြင့်လာခဲ့တာကို တွေ့ရပါတယ်။ နောက်ပြီး ဟိုချီမင်း ဆိုတာကလည်း ဗီယက်နမ် သူရဲကောင်းအဖြစ် ကြားဖူးထားပြီးသား။ သူ့ကို ဂုဏ်ပြုတဲ့အနေနဲ့ အမည်ပေးထားတဲ့ ဟိုချီမင်းမြို့တော်မှာ စာတမ်းဖတ်ပွဲက ကျင်းပမှာဆိုတော့ စာရေးသူအတွက် သိချင်စရာတွေ တစ်လှေကြီးနဲ့ တက်တက်ကြွကြွ ဖြစ်နေရပါတယ်။

ဗီယက်နမ်နိုင်ငံ တောင်ပိုင်းရဲ့မြို့တော် ဟိုချီမင်းစီတီကို ရန်ကုန်ကနေ တိုက်ရိုက်ရောက်တဲ့ လေယာဉ်မရှိသေးပါဘူး။ ဒါကြောင့် အိမ်နီးချင်း ထိုင်းနိုင်ငံ ဘန်ကောက်မြို့ကနေ တဆင့် Transit လုပ်ရပါတယ်။ ဘန်ကောက်ကနေ ဟိုချီမင်းစီတီကို သွားတဲ့ လေယာဉ်ကလည်း နည်းတဲ့အတွက်ကြောင့် သုဝဏ္ဏဘူမိလေဆိပ်ကြီး ထဲမှာ ၁၀နာရီလောက် အချိန်ဖြုန်းခဲ့ရပါတယ်။ တကယ်တော့ ဘန်ကောက်နဲ့ ဟိုချီမင်းက စီးရတာမှ ၄၅မိနစ် တည်းကြာတော့ သိပ်မဝေးလှပါဘူး။ ရန်ကုန်-ဘန်ကောက် လောက်ပဲဝေးပါတယ်။ လေယာဉ်အဆင်ပြေမယ့် အချိန်ကို စောင့်ရတာက ပိုကြာနေတာကိုတွေ့ရပါတယ်။ ဒါတောင် အခုနောက်ပိုင်းမှ ဗီယက်နမ်ကို အသွားအလာ များလာကြလို့ ထိုင်းလေကြောင်းလိုင်းက တစ်ရက်ကို နှစ်ကြိမ်တိုးချဲ့ ပြေးဆွဲပေးတဲ့ လိုင်းအသစ်ပါတဲ့။ နိုင်ငံရဲ့ မြို့တော်မဟုတ်ပေမဲ့ စီးပွားရေးမှာ တံခါးဖွင့်ပေးလာတော့ နိုင်ငံတကာ လေကြောင်းလိုင်းတွေလည်း တိုးချဲ့ ပြေးဆွဲလာကြတာပေါ့။ စင်ကာပူ၊ အင်ဒိုနီးရှား၊ မလေးရှားစတဲ့ အာစီယံနိုင်ငံ လေကြောင်းလိုင်းတွေသာ မကဘူး Cathey Pacific, Air France အစရှိတဲ့ ကမ္ဘာကျော် လေယာဉ်ကြီးတွေလည်း ပြေးဆွဲလာတာကို တွေ့ရပါတယ်။ ဘာပဲပြောပြော ဒီလိုနိုင်ငံတကာ လေယာဉ်ကြီးတွေ ရပ်နားပြေးဆွဲရာကနေ ရမဲ့ နိုင်ငံခြားအခွန်ငွေတွေလည်း နိုင်ငံ အတွက် တိုးလာတာပေါ့။ ဒါ့အပြင် သြစတြေးလျ၊ ဘယ်လ်ဂျီယံ၊ ကမ်ဘောဒီးယား၊ ကနေဒါ၊ တရုတ်၊ ကျူးဘား၊ ဒိန်းမတ်၊ ဂျပန်၊ ကိုရီးယား၊ လာအို၊ မလေးရှား၊ နယ်သာလန်၊ နယူးဇီလန်၊ ပိုလန်၊ ရုရှား၊ စင်ကာပူ၊ စပိန်၊ ဆွီဒင်၊ ဆွစ်ဇာလန်၊ ထိုင်း၊ အမေရိကန်၊ ပြင်သစ်၊ ဂျာမနီ၊ အင်္ဂလန်၊ ဟန်ဂေရီ၊ အိန္ဒိယ၊ အင်ဒိုနီးရှားနဲ့ အီတလီ ကောင်စစ်ဝန်ရုံးတွေလည်းရှိတော့ ဒီမြို့ကနေ နိုင်ငံတကာကို သွားချင်လာချင်ရင် မြောက်ပိုင်းက မြို့တော်ဟနွိုင်း အထိ သွားနေစရာမလိုဘဲ ပြည်ဝင်ခွင့်ဗီဇာကိစ္စ အဆင်ပြေစေတာပေါ့။

“ဆိုင်ဂုံမြစ်ကြီးစီးဆင်းနေတဲ့ ဟိုချီမင်းမြို့တော် (လေယာဉ်ပေါ်မှမြင်ကွင်း)”

ဆိုင်ဂုံမြစ်ကြီးစီးဆင်းနေတဲ့ ဆိုင်ဂုံမြို့ (ဟိုချီမင်းစီတီ)ကြီးကို အပေါ်ကနေ မြင်နေရပါပြီ။ ထန်ဆိုနတ် နိုင်ငံတကာက လေဆိပ်ကြီးကနေ စာတမ်းဖတ်ပွဲကော်မတီကို ကြိုတင် အခန်းလုပ်ထားပေးတဲ့ North Wind Hotel ဆီကို တက္ကဆီငှားပြီးလာခဲ့လိုက်တယ်။ လမ်းတလျှောက် ရင်ခုန်စွာနဲ့ငေးမောကြည့်ခဲ့တာ လေဆိပ်ကထွက်လိုက်တာနဲ့ မန္တလေးကိုပြန်ရောက်သွားသလို ခံစားလိုက်ရတယ်။ ဆိုင်ကယ်တွေကိုတွေ့လိုက် ရလို့လေ။ ယာဉ်စည်းကမ်း၊ စည်းကမ်းကတော့ သိပ်တင်းကြပ်မဲ့ပုံမပေါ်ဘူး။ ကိုယ့်နားလည်မှုနဲ့ကိုယ် သွားလာ နေကြတာကသိသာတယ်။ တချို့မီးပွိုင့်တွေမှာဆို ကားတွေထက် ဆိုင်ကယ်တွေက ပိုများနေတာတွေ့ရတယ်။ တချို့ဆိုင်ကယ်နောက်ခုံတွေမှာဖြစ်စေ ရှေ့မှာဖြစ်စေ အမျိုးအမည်စုံတဲ့ ပစ္စည်းမျိုးစုံကိုတင်ပြီး သယ်ယူ ပို့ဆောင်ရေးယာဉ်အဖြစ် သုံးနေတဲ့သူတွေကိုလည်းတွေ့ရတယ်။

“ဆိုင်ကယ်မြို့တော်”

SEALS XIX [The 19th Annual Meeting of the Southeast Asia Linguistics Society] ကျင်းပမဲ့နေရာက ဗီယက်နမ်အမျိုးသားတက္ကသိုလ်ရဲ့လက်အောက်က လူမှုရေးသိပ္ပံနဲ့ လူ့စွမ်းအားအရင်းအမြစ် တက္ကသိုလ် [USSH, the University of Social Sciences and Humanities] မှာဖြစ်ပါတယ်။ တည်းခိုတဲ့ ဟိုတယ်နဲ့က ခုနှစ်မိနစ်လောက်ပဲ လမ်းလျှောက်ရင်ရောက်တဲ့အကွာအဝေးမှာ ရှိပါတယ်။ မြို့လယ်ခေါင်မှာရှိတဲ့ အတွက် ဒီတက္ကသိုလ်ကကျောင်းသူကျောင်းသားတွေအတွက်လည်း သွားရေးလာရေးလွယ်ကူစေတာ တွေ့ရပါတယ်။ ပင်မတက္ကသိုလ်ကြီးရဲ့အခွဲ အထူးပြုဘာသာရပ် တက္ကသိုလ်ဖြစ်ပေမဲ့ အဆောက်အဦးကြီးက ခြောက်ထပ်၊ ဓာတ်လှေကားနှစ်စင်းနဲ့ ခန့်ထည်တာကိုတွေ့ရပါတယ်။ တက္ကသိုလ်ဝင်းထဲ ၀င်လိုက်တာနဲ့ SEALS XIX Conference 2009 ၂၀၀၉ ဆိုတဲ့ ဆိုင်းဘုတ်ကြီးကို တွေ့လိုက်ရတယ်။ ဆိုင်းဘုတ်နားဘေး တစ်ဖက်တစ်ချက် စီမှာတော့ ဗီယက်နမ်ဝတ်စုံပြည့် ၀တ်ဆင်ထားတဲ့ အမျိုးသမီးသုံးယောက်က ကြိုဆိုနှုတ်ဆက်ပြီး Welcoming Party ပထမထပ်ကိုကြွဖို့ပြောပေးနေတယ်။ တွေ့တွေ့ချင်း စာရေးသူကို ဗီယက်နမ်လူမျိုးထင်လို့ ဗီယက်နမ်ဘာသာစကားနဲ့ပြောဆို နှုတ်ဆက်ကြသေးတယ်။ ဒီတော့ ဗီယက်နမ်မဟုတ်ကြောင်း မြန်မာပြည်က လာတာဖြစ်ကြောင်း ထိုင်းနိုင်ငံနားလေးက နိုင်ငံဖြစ်ကြောင်း အတော်ရှင်းပြလိုက်ရတယ်။

“USSH ကျောင်းတော်ကြီး ”

ပင်မကျောင်းဆောင်ကြီးရဲ့ ပထမထပ်ကို တက်လိုက်တာနဲ့ ရောက်တယ်ဆိုရင်ဘဲ SEALS XIX ဆိုင်းဘုတ်ကြီးကို ထပ်တွေ့လိုက်ရပြီး အဲဒီအောက်မှာတော့ စားပွဲရှည်ကြီးတစ်လုံးရှေ့မှာ တက်ရောက်လာသူတွေ စာရင်းသွင်းနေကြ၊ မိတ်ဆွေအချင်းချင်းနှုတ်ဆက်ကြ၊ ကိုယ့်အဖွဲ့နဲ့ကိုယ်စကား လက်ဆုံကျနေကြတာတွေကို တွေ့လိုက်ရတယ်။ ဒီစာတမ်းဖတ်ပွဲကြီးရဲ့ ဒါရိုက်တာ ဒေါက်တာငုရင်ဗန်ဟောင်း [Dr. Nguyen Van Hue] ကတော့ နိုင်ငံတကာအရပ်ရပ်က တက်ရောက်လာကြတဲ့ စာတမ်းရှင်တွေကို တစ်ယောက်ချင်းvလိုက်နှုတ်ဆက် နေပါတယ်။ အလယ်နေရာမှာတော့ တက်ရောက်လာသူတွေကို ညစာနဲ့ တည်ခင်းဧည့်ခံဖို့ အစားအသောက်တွေ ပြင်ဆင်နေကြတာကို တွေ့ရတယ်။ စာရေးသူလည်း စာတမ်းဖတ်ပွဲ ဒါရိုက်တာကို နှုတ်ဆက်ပြီးတော့ စာတမ်းအကျဉ်းစာအုပ်ကို သဲကြီးမဲကြီးဖတ်နေတုန်း နောက်ကနေ နာမည်ကို မပီကလာ ပီကလာခေါ်ပြီး နှုတ်ဆက်သံကြားလို့ လှည့်ကြည့်လိုက်တော့ SOAS က ကိုရဲကျော်ခိုင် [Dr. Justin Watkins] ဖြစ်နေတာကိုတွေ့ရတယ်။ သူက အခုမှလေဆိပ်ကရောက်ပြီး ဒီကိုတန်းလာခဲ့ရကြောင်းပြောပြီး ဘေးနားက ပြင်သစ်မလေး မ၀င်းဝင်းမော်နဲ့မိတ်ဆက်ပေးတယ်။ စကားပြောဖော်ရသွားတာနဲ့ စာအုပ်ပိတ်ပြီး သူတို့တွေနဲ့အတူ ညနေစာကို ဆာဆာနဲ့အားရပါးရစားပစ်လိုက်တယ်။ ရောက်ရောက်ချင်းနေ့ မေ ၂၇ ရက် အစီအစဉ်ကတော့ ဒီလောက်နဲ့ပြီးသွားခဲ့တယ်။

SEALS XIX စာတမ်းဖတ်ပွဲက မေ ၂၈-၂၉ ရက် နှစ်ရက်ကျင်းပပါတယ်။ ဒီနှစ်ရက်အတွင်း နိုင်ငံတကာက ဘာသာဗေဒနဲ့ အရှေ့တောင်အာရှဘာသာ စကားဆိုင်ရာ စာတမ်းပေါင်း ၇၄စောင်ကို ဖတ်ကြားတင်သွင်းကြမှာပါ။ ဒါတောင်ကျင်းပမဲ့ ရက်နည်းပြီး တင်သွင်းတဲ့စာတမ်းတွေက များနေလို့ တချို့စာတမ်းတွေကို စိစစ်လိုက်ရတယ်လို့ ဒါရိုက်တာကပြောပါတယ်။ စာတမ်းဖတ်ပွဲကို ၂၈ရက်မနက် ၉နာရီမှာ ဒီတက္ကသိုလ်ရဲ့ ပါမောကချုပ် ဒေါက်တာဗိုဗင်ရှန်း [Prof.Dr.Vo Van Sen] ရဲ့နှုတ်ဆက်မိန့်ခွန်းနဲ့ စတင်ဖွင့်လှစ်ခဲ့ပါတယ်။ Keynote Presentation အနေနဲ့ကတော့ Paul Sidwell ရဲ့ "The Austroasiatic Central Riverine Hypothesis" စာတမ်းနဲ့ အော်ရီဂွန် တက္ကသိုလ်က Dr.Scott DeLancey ရဲ့ "Language Replacement And the Spread of Tibeto-Burman" ဆိုတဲ့ စာတမ်းနှစ်စောင်နဲ့ တက်ရောက်လာကြတဲ့ စာတမ်းရှင်တွေကို နှိုးဆော်ဖတ်ကြား ပြခဲ့ကြပါတယ်။ သူတို့နှစ်ဦး ဖတ်ကြား တင်သွင်းအပြီး မှာတော့ နာရီဝက်နားချိန်ပေးတာနဲ့ မနက်စာကို အဲဒီအချိန်ကျမှ စားဖြစ်ပါတော့တယ်။ ကော်ဖီ၊ လက်ဖက်ရည်၊ ရေသန့်တွေနဲ့အတူ ဗီယက်နမ်နိုင်ငံလုပ် ရိုးရာအချိုမုန့်လေးတွေလည်း ပါတာကို တွေ့ရတယ်။ ကိုယ့်မန္တလေးက ထိုးမုန့်၊ လမုန့်တွေနဲ့ ခပ်ဆင်ဆင် အရသာတူနေလို့ မန္တလေးကိုတောင် သွားသတိရလိုက်မိတယ်။ ဆိုင်ကယ်ပေါတာရော၊ မုန့်အရသာ၊ ဟင်းအရသာတွေနဲ့ လူပုံစံတွေကအစ တူနေတာကြောင့် အခုမှ ရောက်ဖူးတဲ့မြို့ပေမယ့် စိတ်ထဲကအလိုလိုရင်းနှီးပြီး ပျော်ရွှင်ပေါ့ပါးတဲ့ အရသာကို ခံစားခဲ့ရတာက ထူးခြားချက်တစ်ခုပါ။

“စိတ်ဝင်တစား ဆွေးနွေးကြသူများ”

တင်သွင်းတဲ့စာတမ်း ၇၄ စောင်ကို အခန်းလေးခန်းခွဲပြီး ပရိုဂျက်တာတွေ လက်တော့ပ်နဲ့ စပီကာစတဲ့ နိုင်ငံတကာ အဆင့်မီ အသုံးအဆောင် အပြည့်အစုံနဲ့ ဖတ်ကြားနိုင်အောင် စီစဉ်ထားတာကို တွေ့ရပါတယ်။ "Phonetic & Phonology" စကားသံဖွဲ့စည်းပုံ (သဒ္ဒဗေဒ)အပိုင်း၊ "Syntax & Lexicology" ၀ါကျတည်ဆောက်ပုံနဲ့ အဘိဓာန်ပညာရပ်အပိုင်း၊ "Applied Linguistics and Others fields" အသုံးချဘာသာဗေဒနှင့် အခြားဘာသာစကားဆိုင်ရာ အပိုင်းဆိုပြီး အဓိကအပိုင်းကြီးသုံးပိုင်းခွဲပြီး ဆိုင်ရာခေါင်းစဉ်အောက်မှာ ဖတ်ကြားတင်သွင်းနိုင်ဖို့ စီစဉ်ထားတာကိုတွေ့ရပါတယ်။ ဒီစာတမ်းဖတ်ပွဲမှာ စာရေးသူအတွက် ထူးခြားတဲ့အစီအစဉ်တစ်ခုကတော့ Poster Presentation ဆိုတာလေးပါ။ သမားရိုးကျ စာတမ်း ဖတ်ကြားတင်သွင်းတဲ့ ပုံစံမျိုးမဟုတ်ဘဲ နံရံကပ်ပိုစတာ သဘော မိမိစာတမ်းကို ဘာသာဗေဒ သီအိုရီတွေ အယူအဆတွေကို ဇယားကွက်တွေ ပုံပြမြေပုံတွေနဲ့ အကျဉ်းချုပ်ပြီး တင်ပြရတဲ့ပုံစံမျိုးပါ။ စာတမ်းရှင်က သက်ဆိုင်ရာစာတမ်းဘေးမှာ ရပ်နေရပြီး စာတမ်းကို လာရောက်ဖတ်ကြား မေးမြန်းသူတွေကို မိမိအယူအဆ ပြန်လည်ရှင်းလင်း ဖြေကြားပေးရပါတယ်။ သက်ဆိုင်ရာ ပိုစတာရှေ့မှာလည်း မိမိတို့ရဲ့ စာတမ်း အပြည့်အစုံကို ကော်ပီဆွဲပြီး အထပ်လိုက်တင်ထားရပါတယ်။ စာတမ်းကို စိတ်ပါဝင်စားသူတွေက ယူသွားလို့ ရတာပေါ့။ ဒီစာတမ်းဖတ်ပွဲမှာ အဲဒီလို Poster Presentation အနေနဲ့တင်ပြတဲ့စာတမ်းပေါင်း ၁၄ စောင်တွေ့ ရှိရပါတယ်။ စာရေးသူရဲ့စာတမ်းကိုလည်း Poster Presentation အနေနဲ့ ဒီတစ်ခေါက်တင်ပြခဲ့ရတာပါ။ အတွေ့အကြုံသစ်ကို ရင်ခုန်စွာနဲ့ မီးစင်ကြည့်ကခဲ့ ရတာပေါ့။ ပိုစတာကပ်တာကအစ ကျောင်းကဘွဲ့လွန်တန်း တက်နေတဲ့ ကျောင်းသူ ကျောင်းသားတွေက စီစဉ်ကူညီပေးကြလို့ အစစအဆင်ချောစေခဲ့ပါတယ်။ "Burmese Slang Language without Standard Slang Dictionary" ဆိုတဲ့ ခေါင်းစဉ်နဲ့တင်ပြခဲ့တဲ့ Poster Presentation အပြီးမှာတော့ ရှေ့မှာချထားတဲ့ စာရေးသူရဲ့ Text ကော်ပီတွေက ကုန်လုနီးပါးဖြစ်သွားပါတယ်။ ပြင်သစ်၊ ဆွစ်ဇာလန်၊ အင်္ဂလန်၊ ကိုးရီးယား နဲ့ ထိုင်းနိုင်ငံကလာတဲ့ စာတမ်းရှင်တချို့က လာရောက်ဖတ်ကြည့် ကြပြီး စာရေးသူကို ဆွေးနွေးမေးမြန်းခဲ့ကြပါတယ်။

“စာရေးသူနဲ့ Poster Presentation ”

SEALS XIX စာတမ်းဖတ်ပွဲကို လာရောက်ဖတ်ကြားကြတဲ့ စာတမ်းရှင်တွေထဲမှာ အိမ်ရှင် ဗီယက်နမ်လူမျိုးတွေနဲက စာတမ်းအရည်အတွက်က အများဆုံး ဖြစ်တာကို တွေ့ရပါတယ်။ အိမ်ရှင်ရဲ့အားသာချက် က အရာတိုင်းမှာ သဘာဝလိုဖြစ်နေတာ ဆိုတော့လည်း မုဒိတာပွားမိပါရဲ့။ ဒုတိယအများဆုံးစာတမ်းရှင်တွေ ကတော့ အိမ်နီးချင်း ထိုင်းလူမျိုးတွေဖြစ်ပါတယ်။ အမေရိကန်၊ အင်္ဂလန်၊ ဆွီဒင်၊ ဆွစ်ဇာလန်၊ ပြင်သစ်၊ ဂျာမနီ၊ နယ်သာလန်၊ ဘယ်လ်ဂျီယန်၊ ကိုးရီးယား၊ တရုတ်၊ ထိုင်ဝမ်၊ စင်ကာပူ၊ အင်ဒိုနီးရှား၊ မလေးရှား၊ သြစတြေးလျားနိုင်ငံတွေက စာတမ်းရှင်တွေကိုလည်း တွေ့ရပါတယ်။ အမေရိကန်က တချို့ဘာသာဗေဒ ဘွဲ့လွန် ကျောင်းသားတွေဆို စာတမ်းမတင်သွင်းဘဲ စိတ်ဝင်စားလို့ အတွေ့အကြုံရချင်လို့ဆိုပြီး လာတက်ရောက် လေ့လာ ကြသူတွေကိုလည်းတွေ့ရပါတယ်။ မြန်မာနိုင်ငံကတော့ တစ်ယောက်သာ တက်နိုင်ခဲ့ပါတယ်။ စာရေးသူတို့ နိုင်ငံမှာလည်း ဗီယက်နမ်တွေလို နိုင်ငံတကာအဆင့်စာတမ်းဖတ်ပွဲတွေကို အိမ်ရှင်အဖြစ်သာ လက်ခံကျင်းပနိုင် ခဲ့ရင်တော့ ဗီယက်နမ်တွေထက်မနည်းတဲ့ စာတမ်းတွေကို ဖတ်ကြားတင်သွင်းနိုင်ကြ လိမ့်မယ် ဆိုတာ စိတ်ထဲကကို သေချာသိနေပါတော့တယ်။

ဖြူဖြူဝင်း(မြန်မာစာ)