နှစ်ပေါင်း၁၅၀အတွင်းမန္တလေးမြို့ကစာကြည့်တိုက်ကြီးများ

ကုန်းဘောင်မင်းဆက် မင်းတုန်းမင်းတရားကြီးဟာ ဗုဒ္ဓသာသနာကို ချီးမြှောက်မယ့်မင်းအဖြစ်
သူ့ကိုယ်သူယုံကြည်စိတ်အပြည့်နဲ့တည်ခဲ့တဲ့ ရတနာပုံမန္တလေးမြို့ကြီးဟာ အခုဆိုရင် နှစ်၁၅၀
တင်းတင်းပြည့်ခဲ့ပါပြီ။ အေဒီ၁၈၅၉ခုနှစ်က စတည်ခဲ့တဲ့ မန္တလေးမြို့ကြီးရဲ့ နှစ်ပေါင်း၁၅၀အတွင်း
အနေအထားဟာ တိုးတက်လာတာတွေလည်းရှိသလို ဆုတ်ယုတ်သွားတာတွေကိုလည်း သင်္ခါရ
သဘောတရားအရတွေ့ကြရမှာပါ။ မြို့ကိုတည်ခဲ့တဲ့ မင်းတုန်းမင်းတရားကြီးကတော့ အတိတ်
တဘောင်ထဲကနမိတ်အတိုင်း ပဉ္စသင်္ဂါယနာကိုတင်ခဲ့ပြီ။ သူတည်ခဲ့တဲ့မြို့ကြီးကလည်း သူ
အုပ်ချုပ်ခဲ့တဲ့နှစ်တွေအတွင်းမှာတော့ အဲဒီခေတ်ကစံနှုန်း မြို့တော်အင်္ဂါရပ်နဲ့အညီ အတတ်နိုင်
ဆုံးပြုပြင်ကြိုးပမ်းခဲ့ပြီးပြီ။ နောင်လာနောက်သားတွေလက်ထက် ဒီကနေ့အထိမန္တလေးမြို့ကြီး
ရဲ့အနေအထားများစွာတွေထဲမှာ လူတစ်ယောက်ရဲ့စိတ်မျက်စိ ဥာဏ်မျက်စိ နှစ်ဖြာတို့ကို ပွင့်
လင်းအမြင်ကျယ်စေတတ်တဲ့ စာကြည့်တိုက်ကြီးတွေရဲ့ အနေအထားလေးတွေကို ဒီဆောင်းပါး
မှာ လက်လှမ်းမီသလောက် လေ့လာကြည့်ချင်ပါတယ်။
စာကြည့်တိုက်ဆိုတာ
စာကြည့်တိုက်ဆိုတာကို စာအုပ်စာတမ်းများစုဆောင်းထားရှိရာနေရာအဖြစ်သာမက စုဆောင်း
ထားရှိတဲ့စာအုပ်တွေကို စနစ်တကျစီစဉ်ထားရှိတဲ့နေရာအဖြစ်ယေဘုယျဖွင့်ဆိုဖော်ပြကြပါ
တယ်။
ဒါကြောင့်စာကြည့်တိုက်တွေဟာပညာဗဟုသုတလိုလားသူရှာဖွေလိုသူတို့အတွက်တော့လူထု
တက္ကသိုလ်လို့တင်စားခေါ်ဝေါ်ကြသလိုဘဝတက္ကသိုလ်လို့လည်း တင်စားခေါ်ဝေါ်ကြပါတယ်။
ဒါ့အပြင်လောကကိုကြည့်မြင်နိုင်တဲ့ လောကပြူတင်းပေါက်ကြီးတွေလို့လည်း ဆိုနိုင်ပါတယ်။
ဒီလိုအရေးပါလှတဲ့စာကြည့်တိုက်ကြီးတွေရဲ့ အစဟာ ဘီစီ၂၅၀၀လောက်ကလို့ ခန့်မှန်းကြပြီး
ဘီစီ ၃၅၆-၃၂၃ခန့်က အီဂျစ်နိုင်ငံရှိ အီလက်ဇနြ္ဒီား The Library of Alexandria
စာကြည့်တိုက်ဟာ အကြီးကျယ်ဆုံးနဲ့ အထင်ရှားဆုံးလို့ဆိုကြပါတယ်။ စာကြည့်တိုက်ကြီးတွေ
စတင်ပေါ်ပေါက်လာရတဲ့ အကြောင်းအရင်းကလဲစိတ်ဝင်စားစရာပါ။ ခရစ်တော်မပေါ်မီ ဘီစီ
၃၆၀၀လောက်က စာပေအရေးအသားပေါ်ပေါက်လာအပြီး အဲဒါတွေကိုခက်ခက်ခဲခဲမှတ်တမ်း
တင်ထားရတဲ့အရာတွေက အခုခေတ်လို စာအုပ်အနေအထားမဟုတ်သေးပါဘူး။
ပရိုင်းရပ်လို့ခေါ်တဲ့ကျူပင်တစ်မျိုးကိုစာရေးဖို့အတွက်လက်ဝင်ခက်ခဲစွာပြုပြင်ထားရပြီး မှိုင်းခံ
မင်တစ်မျိုးကိုအသုံးပြု ကျူရိုးကလောင်နဲ့ထွင်းပြီးရေးထားရတဲ့ ပပိုင်းရပ်စ်စာလိပ်ရှည်ကြီး
တွေ၊ တချို့နေရာမှာတော့ ဗယ်လန်လို့ခေါ်တဲ့နွားသားရေအသုံးပြုစာရေးနည်းတွေ တချို့
ကတောရွှံ့စေးပြားတွေကိုမီးဖုတ်နေလှန်း အခြောက်ခံပြီးမှ ကညစ်လိုအချွန်နဲ့ထွင်းပြီးရေးရ
တဲ့နည်းတွေ မာကျောမညီညာတဲ့ကျောက်သားပြင်လိုဟာမျိုးကို အချောကိုင်ထွင်းဖောက်ပြီး
ရေးသားရတဲ့ ကျောက်စာလိုအရာမျိုးတွေ စသဖြင့်ခက်ခဲလက်ဝင်လှတဲ့နည်းမျိုးစုံနဲ့ရေးသား
မှတ်တမ်းတင်ထားတဲ့အရာတွေဟာရာသီဥတုဒဏ် ရန်သူမျိုးငါးပါးဒဏ်တွေကြောင့် အချိန်မ
ရွေးပျောက်ဆုံးပျက်စီးသွားနိုင်တာကို သိလာကြပါတယ်။ ဒါတွေကိုစနစ်တကျ ထိန်းသိမ်းဖို့
လိုအပ်တာကို ရိပ်မိလာကြလို့ ဒီအမျိုးအစားတေကို တစုတစည်းတည်းလုံခြုံရာသိုလှောင်
သိမ်းဆည်းထားရာက ပေါ်ပေါက်လာရတာဖြစ်ကြောင်းတွေ့ရပါတယ်။

ကမ္ဘာပေါ်မှာ ရှေးအကျဆုံး စာကြည့်တိုက်ကြီးတွေဟာ ခရစ်ယာန်ဘုရားရှိခိုးကျောင်းကြီး
တွေလို့လဲ ဆိုကြပါတယ်။ ဒါပေမယ့် အဲဒီရှေးအခါက ဘာသာရေးကျောင်းကြီးတွေမှာရှိတဲ့
စာကြည့်တိုက်ကြီးတွေဟာ လူတိုင်းဝင်ကြည့်ခွင့်လေ့လာခွင့်မရခဲ့ကြပါဘူး။ ရှေးကပြုစုစု
ဆောင်းခဲ့ကြတဲ့ စာပေအထောက်အထားတွေကို ထိန်းသိမ်းစောင့်ရှောက်ရုံအဆင့်လောက
်သာဖြစ်ခဲ့တယ်လို့ မြင်ပါတယ်။ လူထုစာကြည့်တိုက်အသွင်ဖြစ်ပေါ်လာတာကတော့စာရွက
်နဲ့ရေးမှတ်တမ်းတင်တဲ့စနစ်ပေါ်ပေါက်အပြီး စာပုံနှိပ်စက်တွေ စာအုပ်အသွင်တွေပေါ်ပေါက်
လာရတာလို့ဆိုနိုင်ပါတယ်။
စာကြည့်တိုက်ကြီးတွေကို ထိန်းသိမ်းစောင့်ရှောက်တဲ့နည်းပညာ၊ စာကြည့်တိုက်တစ်ခုရဲ့
လုပ်ငန်းလည်ပတ်ပုံ စတာတွေနဲ့ပတ်သက်တဲ့ စာကြည့်တိုက်ပညာရပ်ကိုတော့ အေဒီ
၁၈၈၇ကမှ အနောက်နိုင်ငံက တက္ကသိုလ်ကြီးတွေမှာစတင်သင်ကြားပို့ချခဲ့တာကို မှတ်
တမ်းများအရလေ့လာသိရှိရပါတယ်။ ဒီနေ့ခေတ်မှာတော့ အမျိုးသားစာကြည့်တိုက်
တက္ကသိုလ်စာကြည့်တိုက် လူထုစာကြည့်တိုက် နဲ့ အထူးပြုဘာသာရပ်စာကြည့်တိုက်ရယ်
လို့ ယေဘုယျလေးမျိုးခွဲပြောလို့ရတဲ့ သမရိုးကျစာကြည့်တိုက်အမျိုးအစားတွေ ပေါ်
လာတာကိုတွေ့ရပါတယ်။
ဒါ့အပြင် ဒီနေ့ခေတ် နိုင်ငံတကာအဆင့်မီစာကြည့်တိုက်ကြီးတွေမှာဆိုရင် e-library
လို့ခေါ်တဲ့ ကွန်ပျူတာသုံး အီလက်ထရွန်နစ်စာကြည့်တိုက်တွေ၊ ဒစ်ဂျစ်တယ်စာကြည့်
တိုက်တွေ ကိုယ့်လျှို့ဝှက်နံပါတ်နဲ့ကိုယ် အသုံးပြုနိုင်တဲ့ အင်တာနက်တွေကိုပါ ချိတ်ဆက်
အသုံးပြုနိုင်အောင် ကျယ်ကျယ်ပြန့်ပြန့်စီစဉ်ဆောင်ရွက်ပေးလာတာကို တွေ့လာရပါပြီ။
စာကြည့်တိုက်ကြီးတွေမှာရှိတဲ့စာအုပ်စာရင်းတွေကိုလည်း အရင်ကလို ကတ်တလောက်
စနစ်နဲ့ ကဒ်တင် ပြုစုထားပြီး ငှားလိုတဲ့ကဒ်နံပါတ်ကိုမှတ်၊ စာအုပ်ရှာခိုင်းတဲ့ ဝန်ထမ်းကို
တဆင့်အရှာခိုင်းနေရတဲ့စနစ်အစား ကွန်ပျူတာနဲ့အက္ခရာစဉ်အလိုက် ဘာသာရပ်အမျိုးစား
အလိုက် စာရင်းတင်လာကြပါပြီ။ ဒါကြောင့် ဖတ်ရှုလိုသူတို့အတွက် အလွယ်တကူရှာဖွေ
ဖတ်ရှုနိုင်တဲ့စနစ်တွေနဲ့အစားထိုးပြုပြင်လာကြတာကိုလည်း တွေ့လာရပါပြီ။
မြန်မာနိုင်ငံမှာတော့ စာကြည့်တိုက်ကြီးတွေကို အနော်ရထာမင်းလက်ထက်ကတည်းက
ပေါ်ပေါက်နေပြီလို့ဆိုရမှာပါ။ ပိဋကတ်တိုက်ကြီးတွေဟာ ပုဂံခေတ်အစကတည်းက ပေါ်
ပေါက်နေတာကို အဲဒီခေတ်ကကျောက်စာတွေရဲ့ အလှူမှတ်တမ်းတွေမှာ အခိုင်အမာတွေ့
ရလို့ပါ။ မြန်မာနိုင်ငံမှာ ခေတ်အဆက်ဆက်က ပိဋကတ်တိုက်ဆိုတဲ့ ဝေါဟာရနဲ့အသုံးပြုခဲ့
ကြတဲ့ စာကြည့်တိုက်ကြီးတွေကိုလွတ်လပ်ရေးရအပြီး ၁၉၄၈ခုနှစ်နောက်ပိုင်းမှသာ
စာကြည့်တိုက်ဆိုတဲ့ဝေါဟာရအဖြစ် ကျယ်ကျယ်ပြန့်ပြန့်ခေါ်ဝေါ်သုံးစွဲလာခဲ့ကြတာကို
တွေ့ရပါတယ်။
ရတနာပုံနေပြည်တော်မန္တလေးခေတ်ကစာကြည့်တိုက်ကြီးတွေ
ဒီမှတ်တမ်းအရ "စာကြည့်တိုက်"ဆိုတဲ့ဝေါဟာရ ပေါ်ပေါက်သုံးစွဲတာဟာ ရတနာပုံမန္တလေး
မြို့ကြီးတည်တဲ့နှစ်ထက် အများကြီး နောက်ကျနေတယ်ဆိုရမှာပေါ့။ ဒါပေမယ့် မင်းတုန်း
မင်းကြီးဟာ မြို့တော်သစ်ကြီးကို ကနဦးအနေနဲ့ ၁-ရွှေမြို့တော်၂-ကျုံး၊ ၃-စေတီ၊ ၄-
သင်္ဂီလျှံမောင်းသိမ်၊ ၅-မဟာအတုလဝေယန်ကျောင်း၊ ၆-သုဓမ္မာဇရပ်၊ ၇-ရွှေစာပိဋကတ်
တိုက် ခုနစ်ဌာနနဲ့ စတင်တည်ထောင်ခဲ့တယ်လို့ မှတ်တမ်းတွေမှာ အခိုင်အမာတွေ့ရလေ
တော့မြို့စတည်ကတည်းကစာကြည့်တိုက်ကြီးပါဝင်တယ်လို့ဆိုရမှာပါ။အဲဒီပိဋကတ်တိုက်ကြီး
ကိုအခုမတွေ့နိုင်တော့ပေမယ့်မန္တလေးတောင်ခြေ ရွှေမြို့တော်ကြီးရဲ့ အရှေ့မြောက်ထောင့်
မှာ တည်ရှိခဲ့ကြောင်းရှေ့ဟောင်းဓာတ်ပုံအထောက်အထားတစ်ခုအရ ဆိုနိုင်ခြင်းဖြစ်ပါတယ်။
ဒီပိဋကတ်တိုက်ကြီးမှာဆိုရင် ကျမ်းဂန်ပေါင်း ၂၀၀၀ကျော်ရှိခဲ့တဲ့အကြောင်း ဦးယံရဲ့ ပဋိ
ကတ်သုံးပုံစာတမ်းအရ ဆိုနိုင်ပါတယ်။ မင်းတုန်းမင်းကြီးရဲ့ အဲဒီပိဋကတ်တိုက်ကြီးဟာ
စာဖတ်ရှုလိုသူတို့အတွက် အမြဲတမ်းတံခါးဖွင့်ပေးထားတဲ့ လူထုစာကြည့်တိုက်ကြီးတစ်ခု
ဖြစ်ခဲ့တာပေါ့။ ဒါ့အပြင် အဂ္ဂမဟာသေနာပတိ ဝန်ရှင်တော် ကင်းဝန်မင်းကြီးကလည်း
အမြင်ကျယ်သူဖြစ်လေတော့ သူ့အိမ်တော်မှာကိုပဲ ကိုယ်ပိုင်စာကြည့်တိုက်ကြီးတစ်ခုရှိခဲ့
ဖူးကြောင်း မှတ်တမ်းတွေမှာတွေ့ရပါတယ်။
၁၈၈၆ခုနှစ်မှာ မန္တလေးမြို့ကြီးကို ရောက်ရှိလာတဲ့ ဒေါက်တာမတ်(Dr.J.E Marks)
ရဲ့ရွှေတချောင်းအနောက်ကမ်းထိပ် ဗြိတိသျှသံတဲဝင်းအတွင်းက သံတဲကျောင်းမှာလည်း
ပညာလာသင်ယူကြတဲ့ မင်းညီမင်းသားသူဌေးသူကြွယ်များရဲ့ သားသမီးတွေနဲ့ စာသင်
ကြားပေးကြတဲ့ ခရစ်ယာန်သာသနာပြုဆရာတွေ ဖတ်မှတ်လေ့လာဖို့အတွက် စာကြည့်
တိုက်ကြီးတစ်ခုရှိခဲ့ပါတယ်။
ဒါတွေသာမက မန္တလေးမြို့တခွင်က ဘုန်းတော်ကြီးကျောင်းတွေမှာလည်း ပေစာ
ပုရပိုက်စာကအစ ပိဋကတ်တော်တွေအထိ စုဆောင်းထားရှိကြတဲ့ ဘုန်းကြီးကျောင်း
ပိုင် စာကြည့်တိုက်ကြီးတွေလည်းရှိတာကို မှတ်တမ်းတွေမှာတွေ့ရပါတယ်။ဒီမှတ်တမ်း
တွေထဲက အထင်ကရတစ်ခုကတော့ တောင်ခွင်သာသနာပိုင်ဆရာတော်ကြီးရဲ့
ပိဋကတ်တိုက်ပဲဖြစ်ပါတယ်။ မန္တလေးမြို့ပြင် တံခွန်တိုင်တောင်ခွင်ကျောင်းတိုက်မှာ
ရှိခဲ့တာပါ။ ပေစာထုပ်ပေါင်း၄၀၀၀နီးပါးရှိခဲ့တဲ့အဖိုးတန်စာကြည့်တိုက်ကြီးတစ်ခုပါ။
ဒီလိုစာကြည့်တိုက်ကြီးတွေရှိခဲ့လို့လည်း အဲဒီခေတ်က ပညာတတ်အမြောက်အမြား
ပေါ်ပေါက်ခဲ့ဟန်တူပါတယ်။

၂၀ရာစုခေတ်မန္တလေးကစာကြည့်တိုက်ကြီးတွေ
မြို့နန်းတည်ခဲ့တဲ့ မင်းတုန်းမင်းကြီးဟာ မြို့ကိုပန္နက်စရိုက်ကတည်းက စာကြည့်တိုက်
အတွက်နေရာအထူးပါပြီးဖြစ်တယ်ဆိုတာ မငြင်းနိုင်ပါဘူး။ဒါ့အပြင် တခြားစာကြည့်တိုက်
တွေရှိခဲ့ကြောင်းကိုလည်း မှတ်တမ်းတွေမှာတွေ့ရပါပြီ။ ပဒေသရာဇ်ခေတ်ကနေ ဗြိတိသျှ
ကိုလိုနီခေတ်ရောက်တေ့ာလဲမန္တလေးမှာ စာကြည့်တိုက်ကြီးတွေဟာ အသွင်အမျိုးမျိုးနဲ့
မြို့နေရာအနှံ့ဆက်လက်ပေါ်ပေါက်လာခဲ့တာကို တွေ့ရပြန်ပါတယ်။ ခုနှစ်စဉ်အလိုက်
ဆက်လက်တင်ပြသွားပါရစေ။ကိုလိုနီခေတ် ၁၈၉၁ခုနှစ်မှာ မန္တလေးတောင်ခြေက
မင်းတုန်းမင်းကြီးရဲ့ပိဋကတ်တိုက်တော်နားမှာပဲ မန္တလေးအခလွတ်ပိဋကတ်တိုက်ပေါ်ပေါက်
ခဲ့ပါတယ်။ ပါတော်မူပြီးနောက် ၂၀ရာစုဦးပိုင်းမှာအစောဆုံးပေါ်ပေါက်ခဲ့တဲ့ စာကြည့်တိုက်
အဖြစ် မှတ်တမ်းတင်ရမှာပါ။ ၁၉၁၅ခုနှစ်မှာတော့ဝိုင်အမ်ဘီအေအသင်းကြီးက ဝိုင်အမ်
ဘီအေပိဋကတ်တိုက်ကို ဝါးတန်းရပ်မှာ စတင်ဖွင့်လှစ်နိုင်ခဲ့ပါတယ်. ၁၉၁၇ခုနှစ်မတော့
တောင်ပြင်မှာ ပိဋကတ်ကျောက်စာအသင်းကြီးက ကြီးမှူးပြီး စာကြည့်တိုက်တစ်ခုဖွင့်လှစ်
ခဲ့ပါတယ်။၈၄လမ်းအနောက်ဖက် ရဟိုင်းရပ်မှာတော့ ၁၉၂၂ခုနှစ်မှာ မဟာအောင်မြေစာ
ဖတ်အသင်းဆိုပြီး အသွင်သစ်စာကြည့်တိုက်တစ်မျိုး စတင်ပေါ်ပေါက်လာပါတယ်။ ဒီနေ့
ခေတ်အခမဲ့ လမ်းဘေးစာဖတ်အသင်းလေးတွေရဲ့ရှေ့ပြေးလို့ဆိုရမှာပေါ့။ သင်္ကန်းတန်း
ရပ်မှာရှိတဲ့ အကျဉ်းထောင်မှာတော့ အကျဉ်းထောင်စာကြည့်တိုက်ကို ၁၉၂၆ခုနှစ်မှာ တည်ထောင်ဖွင့်လှစ်ခွင့်ပြုခဲ့တာကိုတွေ့ရပါတယ်။ ဒီနောက်မှာတော့ ၁၉၃၃တစ်နှစ်တည်း
မှာကိုပဲ ဗုဒ္ဓသာသနာနုဂ္ဂဟကျောင်းသားဟောင်းအသင်းစာကြည့်ပိဋကတ်တိုက်၊ ဝါးတန်း
ရပ်မှာတော့ လူငယ်များကြီးပွားရေးအသင်းစာကြည့်ပိဋကတ်တိုက်၊ သာကဝန်ကျောင်း
တိုက်မှာလည်း ပိဋကတ်တိုက်တစ်တိုက် အသီးသီးပေါ်ပေါက်လာတာကို အားရဖွယ်တွေ့ရှိ
ရပါတယ်။ ၁၉၃၄မှာတော့ ဒီဘိုးလမ်းက ဒို့ဂုဏ်ရည်စာဖတ်အသင်း၊ အရှေ့ပြင်နန်းတော်
ရှေ့မြောက်ပိုင်း ဗုဒ္ဓဝေယျာဝစ္စစာဖတ်အသင်းနဲ့ အနောက်ပြင် ဓာတ်နန်းရပ်မှာတော့
သမာဆန္ဒစာဖတ်အသင်းစတာတွေ အပြိုင်းပြိုင်းပေါ်ပေါက်လာပြန်ပါတယ်။ မန္တလေး
တောင်ပြင်ကလည်းအားကျမခံ ၁၉၃၅ခုနှစ်မှာ တဒ္ဓိတစာကြည့်တိုက်အဖြစ်တည်ထောင်
လိုက်တဲ့အပြင် ဘုရားကြီးမင်းသားစုရပ်မှာလည်း ဒို့ခေတ်စာဖတ်အသင်းရုံဆိုပြီး ရပ်ကွက်
နေလူထုအတွက် တည်ထောင်ဖွင့်လှစ်ခဲ့ပါတယ်။
စာကြည့်တိုက်တွေအတန်အသင့်ရှိပြီးဖြစ်တဲ့ ဝါးတန်းရပ်မှာလည်း ဗုဒ္ဓဘာသာစာကြည့်
ပိဋကတ်တိုက် ထပ်မံဖွင့်လှစ်ခဲ့သလို မြောက်ပြင်ကဥပုသ်တော်ရပ်မှာလည်း ဗုဒ္ဓဘာ
သာစာကြည့်တိုက်တစ်ခုတည်ထောင်နိုင်ခဲ့တော့ ၁၉၃၅တစ်နှစ်တည်းမှာပဲ မြို့ရဲ့ ရပ်ကွက်
စုံနယ်ပယ်စုံလုနီးပါး စာကြည့်တိုက်တွေ စာဖတ်အသင်းတွေ အားရဖွယ်ကောင်းအောင်
ပေါ်ပေါက်လာတာကိုတွေ့ရပါတယ်။ ၁၉၃၆မှာတော့အရှေ့ပြင်မှာထပ်မံပြီး ရွှေလက်ဝါး
စာကြည့်တိုက်နဲ့ မြန်မာမူစလင်လူငယ်များရဲ့စာဖတ်အသင်း စတင်ပေါ်ပေါက်လာခဲ့ပါ
တယ်။ ၁၉၃၇တစ်နှစ်တည်းမှာပဲ ဝါးတန်းရပ်မှာ ထပ်မံလို့ သူရဿတီပညာတိုးပွားရေး
အသင်းရဲ့စာကြည့်တိုက်၊ အနောက်ပြင် အာဠဝတီလမ်းက ဦးကိုလေး၏စာဖတ်အသင်း၊
ပေါက်မြိုင်ကျောင်းတိုက်ကဦးဝိမလအထက်တန်းကျောင်း စာကြည့်ပိဋကတ်တိုက်၊
အုတ်ဝန်မင်းရဲ့ ပိဋကတ်တိုက်တို့အပြင် မန္တလေးတောင်ခြေမှာလည်း မြန်မာစာပေတိုး
ပွားရေးအဖွဲ့စာဖတ်ခန်းနဲ့ မန္တလေးကဗေဒသိပ္ပံအဖွဲ့ကြီးရဲ့စာဖတ်ခန်းတွေလည်းပေါ်ပေါက်
ခဲ့ပါတယ်။
ရန်ကုန်အရှေ့အာရှတိုက်လူငယ်များအစည်းအရုံးကလည်း စာကြည့်တိုက်ခွဲတစ်ခုအဖြစ်
၁၉၄၂မှာ မန္တလေးကိုလာရောက်ဖွင့်လှစ်နိုင်ခဲ့ပါတယ်။ အဲဒီနှစ်အတွင်းမှာပဲ သာသနာ
ရေးပိဋကတ်တိုက်တစ်ခုကို ဝါးတန်းရပ်မှာထပ်မံတည်ထောင်ခဲ့တာကိုတွေ့ရပါတယ်။
၁၉၄၇ဇူလိုင်၁၇ရက်နေ့မှာတော့ မန္တလေးယူနီဗာစီတီကောလိပ်ကျောင်းကို စတင်ဖွင့်လှစ်
နိုင်ရုံသာမက ကောလိပ်စာကြည့်တိုက်ကိုပါ ပူးတွဲဖွင့်လှစ်နိုင်ခဲ့ပါတယ်။ ဒီနေ့တည်ရှိနေ
တဲ့ ရာဇာတ်ခန်းမနေရာကို မန္တလေးတက္ကသိုလ်စာကြည့်တိုက်ကြီးအဖြစ် ရောက်ရှိလာ
တာကတော့ ၁၉၅၅ခုနှစ်ကမှဖြစ်ပါတယ်။ ဒါပေမယ့် မြန်မာစာဌာနနဲ့အပေါ်အောက်တွဲ
ထားခဲ့တာပါ။ ၁၉၆၈ရောက်မှ ရာဇာတ်ခန်းမဆောင်တစ်ခုလုံးကိုစာကြည့်တိုက်အပိုင်
အဖြစ် လွှဲပြောင်းပေးအပ်ခဲ့တာ ဒီနေ့အထိ မန္တလေးတက္ကသိုလ်ပင်မစာကြည့်တိုက်ကြီး
အဖြစ် အသုံးပြုနေဆဲပါ။ အခုတော့အထက်မြန်မာနိုင်ငံမှာ အကြီးဆုံးသော စာကြည့်
တိုက်ကြီးပါတဲ့။
၂၁ရာစုခေတ်စာကြည့်တိုက်ကြီးတွေ
မန္တလေးမြို့ကြီးဟာ စာပေကိုဖြန်ဝေပေးရာ အသိအမြင်ကိုဖြန့်ဝေပေးရာစာကြည့်တိုက်ကြီး
တွေနဲ့ပတ်သက်လို့ ရေခံမြေခံကောင်းခဲ့တာ အလားအလာကောင်းခဲ့တာကို ၂၀ရာစုတစ်ခု
လုံးကိုခြုံကြည့်လိုက်တာနဲ့ တင်ပဲ အထင်အရှားတွေ့လာကြရပါပြီ။ ၂၁ရာစုခေတ်အတွင်း
မှာတော့ မန္တလေးတက္ကသိုလ်ကြီးအတွင်းမှာ ပင်မစာကြည့်တိုက်ကြီးသာမက ဌာနတိုင်းမှာ
အထူးပြုဘာသာရပ်တွေအလိုက် ဌာနစာကြည့်တိုက်တွေကိုပါ သီးခြားတိုးပွားဖွင့်လှစ်လာ
ကြတာကိုလည်း တွေ့လာရပါပြီ။ဒါပေမယ့် စာကြည့်တိုက်ကိုလည်ပတ်တဲ့ စနစ်တော်
တော်များများကတော့ ၂၀ရာစုကအတိုင်းကဒ်စနစ်ပဲရှိနေပါသေးတယ်။ စာအုပ်အသစ်တွေ
တိုးလာရင်ဖြစ်စေ တခြားဌာနခွဲတစ်ခုကို ခွဲဝေပို့လိုက်ရင်ပဲဖြစ်စေ ကဒ်ပြားပေါ်မှာ စာရင်း
တင်စာရင်းဖျောက်စနစ်တွေနဲ့ပဲ လည်ပတ်လှုပ်ရှားနေတုန်းပါ။
အထက်မြန်မာနိုင်ငံရဲ့ အကြီးဆုံးစာကြည့်တိုက်အဖြစ် သတ်မှတ်ထားတဲ့ရာဇာတ်ဆောင်က
ပင်မစာကြည့်တိုက်ကြီးမှာလည်း ဒီစနစ်နဲ့ပဲလည်ပတ်နေဆဲဖြစ်တာကို တွေ့ရပါတယ်။
စာဖတ်လိုသူတို့အတွက် အလွယ်တကူရှာဖွေပေးနိုင်မယ့် ကွန်ပျူတာစနစ်နဲ့ ဖတ်ရှုတဲ့
စနစ်ကို မတွေ့ရသေးပါဘူးဒီစာကြည့်တိုက်ကြီးကနေခွဲပြီး လမ်း၈၀ ၃၃လမ်းနဲ့၃၄လမ်း
ကြားမှာရှိတဲ့ယခင် ရတနာဘူမိကောလိပ်ပိုင်နေရာလေးမှာ ရှေးဟောင်းမြန်မာစာပေ
ရေးရာဌာနဆိုပြီး စာကြည့်တိုက်ခွဲလေးတစ်ခု ၂၀၀၁ခုနှစ် ဧပြီလ၁၀ရက်နေ့ကဖွင့်
့လှစ်ခဲ့တာကို တွေ့ရပါတယ်။ ဖွင့်လှစ်ရတဲ့ရည်ရွယ်ချက်က တက္ကသိုလ်ကောလိပ်အသီး
သီးက ပညာရှာသူ သုတေသနပြုလိုသူ ကျောင်းသူကျောင်းသား ဝန်ထမ်းတွေအတွက်
သီးခြားဌာနတစ်ခုအဖြစ် ဖွင့်တာလို့ သိရပါတယ်။ ကျောက်စာပြခန်း၊ ပေပုရပိုက်ပြခန်း၊
စာအုပ်ပြခန်း၊ မြန်မာမှုပြခန်း၊ e- resource centre ၊ e-learning centre
e-library တွေနဲ့အတူ ရည်ညွှန်းစာဖတ်ခန်းတွေပါဝင်ပါတယ်။
ဒီမှာရှိတဲ့ စာအုပ်တွေ အထောက်အထားတွေ အများစုကတော့ အရင်အခိုင်အမာရှိပြီး
သား တက္ကသိုလ်နဲ့ ဌာနခွဲစာကြည့်တိုက်တွေကနေ ဝေမျှယူပြီး ခင်းကျင်းဖွင့်လှစ်ထား
တာတွေဖြစ်ပါတယ်။ ကနဦးအစက ဖွင့်လှစ်တဲ့နေ့တစ်နှစ်ပြည့်တိုင်းအဲဒီဝန်းထဲမှာပဲရှိတဲ့
ဌာနပိုင်ခန်းမကြီးမှာ နှစ်ပတ်လည်အထိမ်းအမှတ် သုတေသနစာတမ်းဖတ်ပွဲတွေပြုလုပ်ခဲ့
တာကို တွေ့ရပါတယ်. ၂၀၀၀ပြည့်လွန်နှစ်တွေမှာ ဝိဇ္ဇာသိပ္ပံဘာသာရပ်တွေအတွက် မိန်းလို့ခေါ်ကြတဲ့မန္တလေးတက္ကသိုလ်ကြီးသာမကတော့ပါဘူး။ မြို့ပြင်ကတောင်သမန်
အင်းနားမှာ ရတနာပုံတက္ကသိုလ်ကြီးကိုပါခွဲဖွင့်နိုင်ခဲ့တော့ ပင်မစာကြည့်တိုက်ကြီးနောက်
တစ်ခုတိုးလာသလို ဌာနခွဲစာကြည့်တိုက်လေးတွေလည်းအကြောင်းအားလျော်စွာပေါ်ပေါက်
လာရတယ်လို့ ဆိုရမှာပေါ့။ ၂၀၀၁ခုနှစ်ထဲမှာပဲ ရန်ကုန်ဗြိတိသျှကောင်စီကဖွင့်လှစ်တဲ့
စာကြည့်တိုက်တစ်ခုကို လမ်း၃၀ ၇၇လမ်းနဲ့၇၈လမ်းကြားက SY တိုက်ခန်းမှာစတင်ဖွင့်
လှစ်နိုင်ခဲ့ပါတယ်။ ၂၁ရာစု မန္တလေးမြို့မှာ ဒီနေ့အထိထပ်မံတွေ့နိုင်သေးတဲ့ စာကြည့်
တိုက်ကြီးတွေကတော့ ရွှေစာရံအရပ်မှာရှိတဲ့ ယဉ်ကျေးမှုတက္ကသိုလ်ကြီးကပင်မစာကြည့်
တိုက်၊ အရှေ့ပြင်က ပန်တျာကျောင်းဝင်းအတွင်းရှိစာကြည့်တိုက် လမ်း၇၀နဲ့၇၁လမ်းကြား
၂၈လမ်းပေါ်မှာရှိတဲ့ရှေးဟောင်းသုတေသနဌာနကစာကြည့်တိုက် ၇၈လမ်းနဲ့၂၈လမ်း
ထောင့်မြန်မာမီးရထားအပိုင်ဝန်းထဲက ရွှေဥဒေါင်းစာကြည့်တိုက် ရန်ကုန်စာပေဗိမာန်က
ခွဲဖွင့်လှစ်ထားတဲ့ စာပေဗိမာန်စာကြည့်တိုက် (ယခင်ရတနာပုံဈေးအပေါ်ထပ်) လမ်း၈၀
နဲ့၂၄လမ်းထောင့်မှာရှိတဲ့ ယဉ်ကျေးမှုဝန်ကြီးဌာနပိုင်ယဉ်ကျေးမှုစာကြည့်တိုက် မြို့တောင်
ဖက်အထွက် အမရပူရမရောက်မီတမ္ပဝတီအရပ်မှာရှိတဲ့ ဗားကရာပိဋကတ်တိုက်တော်ကြီး၊
လမ်း၃၀အပေါ်မန္တလေးဆေးတက္ကသိုလ်ကစာကြည့်တိုက် မန္တလေးတောင်ရဲ့မြောက်ဖက်အိုး
ဖိုနည်းပညာတက္ကသိုလ်နဲ့ရေတံခွန်တောင်နည်းပညာတက္ကသိုလ်ကစာကြည့်တိုက်တွေ
ဒဟတောက ကွန်ပျူတာတက္ကသိုလ်ကစာကြည့်တိုက်စတာတွေကို အခိုင်အမာတွေ့နိုင်ပါ
တယ်။ ဒီလိုအစိုးရကောလိပ်၊ တက္ကသိုလ်တွေ ဌာနဆိုင်ရာစာကြည့်တိုက်တွေရဲ့သဘော
ကတော့ သက်ဆိုင်ရာကျောင်းသူကျောင်းသားဆရာဆရာမတွေနဲ့ဝန်ထမ်းတွေအတွက်သာ
အများဆုံးဖြစ်ပြီး သူတို့တွေသာအသုံးပြုနိုင်တဲ့စာကြည့်တိုက်ကြီးတွေပါ။ဘယ်သူမဆို
ဝင်ရောက်အသုံးပြုငှားရမ်းလို့မရပါဘူး။ ဒါကြောင့်ထင်ပါတယ် ပညာရပ် ဘာသာရပ်
တွေနဲ့မဆိုင်ဘဲ တခြားလစဉ်ထွက် မဂ္ဂဇင်းဂျာနယ်တွေ ဝတ္ထုတွေကိုလည်းဖတ်ရှုနိုင်တဲ့
အခငွေကြေးနဲ့ ပေးငှားရတဲ့ စာအုပ်အငှားဆိုင်တွေ မန္တလေးမှာရှိလာသလို တချို့
ကုသိုလ်ဖြစ်ထူထောင်လာကြတဲ့ အခမဲ့စာဖတ်ဝိုင်းလေးတွေ စာဖတ်ခန်းလေးတွေစာ
ကြည့်တိုက်လေးတွေကိုလည်းတွေ့လာရပါတယ်။
၂၀၀၂ခုနှစ်မှာတော့ နန်းရှေ့က ဖောင်တော်ဦးဘုန်းတော်ကြီးစာသင်ကြားရေးကျောင်း
ကြီးမှာ အလှူရှင် Mr. Graham Millington &Mrs. Diana Millington
တို့ကမတည်ပြီး သုတကာမီစာကြည့်တိုက်ကြီး စတင်တည်ထောင်ဖွင့်လှစ်နိုင်ခဲ့ပါတယ်။
ကျောင်းက ဘုန်းတော်ကြီးတွေ ဆရာဆရာမတွေနဲ့ ကျောင်းသူကျောင်းသားတွေ
သာမကပြင်ပကလေ့လာလိုသူ ပညာရှင်များပါ အသင်းဝင်ကဒ်ကလေးလုပ်ထား
တာနဲ့အသုံးပြုလို့ရအောင်စီစဉ်ထားတာကို တွေ့ရပါတယ်။အခုဒီစာကြည့်တိုက်လေး
ဖွင့်တာ ခုနစ်နှစ်ထဲအေ၇ာက်မှာတော့Audio Tapes/CDs တွေအသုံးပြုလို့ရရုံသာ
မက ကွန်ပြူတာနဲ့လည်းအသုံးပြုလို့ရအောင် အားထုတ်လာတာတွေ့ရပါတယ်။
အသင်းဝင်ကြေးကလည်းဈေးသိပ်မကြီးဘဲ အများတတ်နိုင်တဲ့ဈေးပါ။ သူ့ထဲမှာတင်ပဲ
ထိုင်ဖတ်လို့ရသလို အိမ်တွေကိုလည်း ရက်အကန့်အသတ်နဲ့ငှားရမ်းခွင့်ရှိပါတယ်။
စာကြည့်တိုက်ဖွင့်ချိန်က နေ့စဉ်နံနက်၉နာရီမှညနေ၄နာရီအထိပါ။ တနင်္ဂနွေတစ်
ရက်တော့ နေ့တဝက်ပိတ်ပါတယ်။နောက်စာကြည့်တိုက်တစ်ခုကတော့ ၃၂လမ်းနဲ့
၃၃လမ်းကြား ၈၃လမ်းနဲ့၈၄လမ်းကြားက စာရေးဆရာမကြီးလူထုဒေါ်အမာကုသိုလ်
ပြုမတည်ခဲ့တဲ့ လူထုစာကြည့်တိုက်ကြီးပါ။ အဆောက်အဦပုံစံကအစ စာကြည့်တိုက်
ပုံစံတွေအတိုင်း စနစ်တကျတည်ဆောက်ပြင်ဆင်ထားတာကိုတွေ့ရပါတယ်။
၂၀၀၈ခုနှစ်ကတော့ ၂၆လမ်း ၇၁လမ်းထောင့်မှာရှိတဲ့ အမေရိကန်စင်တာမှာလည်း
Jefferson Centre ဆိုတဲ့ စာကြည့်တိုက်တစ်ခုစတင်ဖွင့်လှစ်နိုင်ခဲ့ပါတယ်။ ဖွင့်စဖြစ်လို့
စာအုပ်တွေကိုအပြင်ကိုမငှားနိုင်သေးတာကိုတွေ့ရပါတယ်။
ဒီလိုပဲ ၂၆လမ်း ချမ်းသာကြီးဘုရားနားက ဇာတိမာန်စာကြည့်တိုက်၊ နန်းရှေ့က
နယ်လုံးဆိုင်ရာစာကြည့်တိုက်၊ အောင်တော်မူအရပ်က လင်းရောင်ခြည်စာကြည့်တိုက်
စတာတွေကလည်း ကုသိုလ်ဖြစ်တည်ထောင်ဖွင့်လှစ်ထားကြတဲ့လူထုစာကြည့်တိုက်
ကြီးတွေအဖြစ် တွေ့ကြရပါတယ်။
၂၁ရာစုမှာ အဆောက်အဦတစ်ခုအတွင်း စာအုပ်မှတ်တမ်းတွေကို စနစ်တကျနဲ့
ကဒ်တင်စာရင်းပြုစုထားပြီး စာဖတ်ဖို့နေရာစာကြည့်ခုံတွေ စာဖတ်ခန်းတွေပါတဲ့
စာကြည့်တိုက်တွေပေါ်ပေါက်လာသလို လမ်းဘေးပလက်ဖောင်းလိုနေရာလွတ်လေး
တွေမှာလည်း အလျဉ်းသင့်သလို စားပွဲနဲ့ခုံလေးတွေနဲ့အတူ တပိုင်တနိုင်စုဆောင်း
ထားတဲ့ စာအုပ်လေးတွေ ဂျာနယ်လေးတွေကိုခင်းကျင်းထားတဲ့အခမဲ့စာဖတ်ဝိုင်း
လေးတွေကိုလည်း တွေ့လာရပါတယ်။ မန္တလေးသားကိုစန်းယုကျော် မတည်ထား
တဲ့ မင်းတဲအီကင်းရပ် ၁၉လမ်းက "ဖတ်ပါ"ဆိုတဲ့ စာဖတ်ဝိုင်းလေးက ဒီလိုပုံစံ
အသစ်တွေအထဲကအထင်ကရတစ်ခုလို့ဆိုရမှာပါ။
အခုနောက်ပိုင်း လူငယ်လေးတွေဟာ သူတို့တတ်နိုင်သလောက် အခမဲ့စာဖတ်ဝိုင်း
လေးတွေ စာဖတ်ခန်းလေးတွေကိုကိုယ်ပိုင်အသိစိတ်နဲ့ဖွဲ့စည်းတည်ထောင်လာကြ
တာကလည်းအလွှာမရွေးပညာရှာလို ဗဟုသုတရှာမှီးလိုတဲ့ မန္တလေးမြို့သူမြို့သား
တွေအတွက် ဝမ်းသာစရာတစ်ခုပါ။ အသင်းဝင်ကဒ်တွေလုပ်တကူးတကသွားမှရမယ့်
စာကြည့်တိုက်ကြီးတွေရှိ်သလို ကိုယ့်အရပ်ထဲမှာပဲ သွားရင်းလာရင်းပေါ့ပေါ့ပါးပါး
ဝင်ရောက်ဖတ်ရှုလို့ရနိုင်တဲ့ ဒီလမ်းဘေးစာဖတ်ဝိုင်းလေးတွေဟာလည်း မရှိမဖြစ်
လိုအပ်ချက်တစ်ခုလို့မြင်မိပါတယ်။
နိဂုံးချုပ်
မန္တလေးမြို့ကြီးရဲ့ အနေအထားများစွာတွေထဲမှာ လူတယောက်ရဲ့ စိတ်မျက်စိဥာဏ်မျက်စိ
နှစ်ဖြာတို့ကို ပွင့်လင်းအမြင်ကျယ်စေတတ်တဲ့ စာကြည့်တိုက်ကြီးတွေရဲ့ အနေအထား
လေးတွေဟာ မြို့နန်းတည်မင်းတုန်းမင်းတရားကြီးလက်ထက်ကတည်းက ၂၁ရာစုနှစ်
အထိတိုးတက်လာတာတွေလည်းရှိသလိုယုတ်လျော့သွားတာတွေကိုလည်း တွေ့ကြရ
ပါတယ်။ ဒီတိုးတက်မှုနဲ့ယုတ်လျော့မှုနှစ်မျိုးမှာတိုးတက်မှုကပိုခဲ့တာကိုတွေ့ရလို့
မန္တလေးမြို့သူမြို့သားတွေအတွက် ဝမ်းမြောက်ဝမ်းသာဖြစ်ရသလို ဒီလိုတိုးတက်လာဖို့
ကိုလည်းအလွှာစုံအရွယ်စုံက ဒီမြို့သူမြို့သားတွေကပဲ ကြိုးပမ်းခဲ့ကြတာဖြစ်နေတော့
ကိုယ့်မြို့ကြီး နှစ်၁၅၀ပြည့်မွေးနေ့မင်္ဂလာမှာ ဂုဏ်ယူဝင့်ကြွားစွာနဲ့ပဲ ဂုဏ်ပြုမှတ်တမ်း
တင်လိုက်ရခြင်းဖြစ်ပါတယ်။
ကိုးကားစာရင်းစု
wikipedia encyclopedia (online)
နှစ်တစ်ရာပြည့်မန္တလေး(ရွှေကိုင်းသား)
ဒုတိယအကြိမ်လူထုကြီးပွားရေးစာအုပ်တိုက် ၂၀၀၇။
စာကြည့်တိုက်သမိုင်း-၁၂ဇွန်၁၉၆၇(ရွှေကိုင်းသား)
ဒေါက်တာသန်းထွန်းထုတ်ဝေ။
ရှေးခေတ်မြန်မာစာကြည့်တိုက်များ
(ဦးတင်ဦး ကမ္ဘာ့ဗုဒ္ဓတက္ကသိုလ်စာကြည့်တိုက်)။
စာကြည့်တိုက်လုပ်ငန်းစာတမ်းများ။
မန္တလေးတက္ကသိုလ်စာကြည့်တိုက်
(ဥာဏ်ထွန်း)မန္တလေးတက္ကသိုလ်
နှစ်၅၀ပြည့်နှစ်လယ်မဂ္ဂဇင်း။
မိုးဂျာနယ်အမှတ်၁၄ဇန်နဝါရီ၂၀၀၈။
နှစ်ငါးဆယ်ပြည့်မန္တလေး
(ဆရာဝန်တင်မောင်ကြည်)
ပဉ္စဂံစာအုပ်တိုက်စာအုပ်၁၃ဒီဇင်ဘာ၂၀၀၈။
ဖြူဖြူဝင်း(မြန်မာစာ)